【推薦序】

以種作的心，為台語詩開拓新風土

――序介陳金順詩集《阮兜隔壁彼間美術館》

◎李敏勇

金順是一位真打拼的台語文學書寫者。三不五時，我會收著伊寄來的新册。即擺，伊寄《阮兜隔壁彼間美術館》的詩集稿予我，問我會當寫一篇話頭麼。伊擱講：「字數濟少，由你主意」。我一向關心台語文書寫，前幾年，我同年的朋友鄭福田，是太陽能産業茂迪公司的創辦人，往生了後，紀念伊的基金會為鼓勵台語文書寫，舉辦「生態文學獎」獎勵台語文詩，我受託為召集人。我想講三人評審小組，若召集人不變，其他兩人每年輪流變動，也可以擴大觀照面。揣有台語詩資歷的向陽，佮也寫客語詩的曾貴海――伊嘛有生態環境保護運動的經歷。不想講決選名單公佈了後，有落選的參選者唆弄決選入圍、只得到佳作的人，拒絕受獎；擱再要求正獎得獎人也共款拒絕。當然，正獎得獎人有領獎。為著安呢，我無想擱參與這個奬項，以獎勵台語文書寫的鄭福田生態文學獎也停辧了。我不知影，一寡人講台語文，到底是為台語文，抑是為家己？

評選委員的我、曾貴海、向陽，被唆弄是非的人，講無資格評審。參選無得獎，滋生是非，講向陽真久無寫台語詩：嘛講寫客語詩的曾貴海無資格；我，也被批評濟濟。這是台語文書寫者歡喜看著的代誌？我的通行台語詩之路真短，只出版過有聲詩集《一個台灣詩人的心聲告白》及《美麗島詩歌》，以及佮蕭泰然合作的許多歌樂，也有真濟台語詩歌被作曲家譜曲。佇我心內，台語文受著殖民者迫害，漢文古典猶原存在，但是口語化的問題，講或是寫，攏一直無法度真正解決。連台語文運動內部嘛有眉有角，明明是弱勢的文化生態，家己刣賺腹內，真正有影。

金順請我佇伊的新册起話頭，我一聲答應，想欲鼓勵伊。佇府城台南的伊，真正認真。台語文雜誌一直看著伊的作品。人真實在、謙虛。伊的書寫文類真濟，不只是詩。這本詩集用內面「相思恆春」這輯的一首詩〈阮兜隔𤩹彼間美術館〉作册名，是寫原來警察局改設的台南美術舘1館，對照原台南州廳改置有年的台灣文學館，詩行有時代的形影，有美術佮文學的交集。生活佇府城台南的金順，佮伊的環境真有照應，予人感覺著秋天下晡時、莿桐花紅艷的廣埕，古典、現代、後現代的文化風景。

這本詩集，有孤行詩佮兩逝詩，分別是一行、二行詩，類似俳句。其中，兩首〈反〉：內容攏是「228」，有特別的意味。〈秋節〉是「十六級風/吼出恆春的鄉愁」；〈文字獄〉：「三言兩語/驚死一枝萬年筆」，顯示金順的巧思。伊佇「七股囝仔」這輯十首，寫予喜鵲微醺咖啡店頭家娘儷嬟。七股，是台南海邊的漁村，有魚塭、鹽埕，七股囝仔寫七股，這位「重情重義/清新良女」，不知是誰人？七股囝仔的心意，有時平淡，有時嘛佇〈落雨聲〉的半暝：「一港滿流的海水/對天𥚃捙跋反/我佇破碎的陷眠𥚃/沐沐泅」。

「相思恆春」這輯是地景詩，除了恆春，亦有其他所在。〈阮兜隔壁彼間美術館〉嘛佇內面，北台灣寫著〈悠悠淡水線〉這條改做捷運的舊鐵枝路，寫啊寫，寫到228大屠殺。「田野調查」寫人，鴨母王、賴和、陳澄波、鹿野忠雄、湯德章、史明、歐陽文、黃金島、陳錫煌、林智信、黃華、萬正雄、林瑞明、方耀乾、齊柏林、王貞文、胡長松、蔡文傑，攏在內。嘛寫著我，真歹勢！對自由有夢想的金順，「自由的天」這輯，講伊的詩心，講詩行：「詩是文學國度的通行證」，「詩是世界是宇宙」⋯伊佇真濟觀照的事物發現詩之為詩。「自由的天/予這隻鳥仔佮彼隻鳥/上蓋曠闊的記持」，主題真闊，題材嘛闊。〈春夏秋冬〉四季的詩情，映照在田野、稻埕、溪岸、懸嶺，以春風、夏日、秋霜、冬雪相配，季節性的詩情滿滿。伊用心看，用心想，佇山林看著「山風滾躘」、「山壁水沖」、「山溪破腹」的變奏。寫啊寫，寫到地球的燒烙，展現伊的本土性佮世界心。

〈言語〉這首詩，佇「春雨稀微」這輯，伊講「言語是一款/無邊無界的概念」，講「言語是一款/有影有跡的概念」，中間講真濟言語現象。語言是言靈，文字或非文字，親像地圖佮現場的關係。世界，其實在語言𥚃，話語就是言語。詩人要掌握言靈，才能真正形成詩行。金順佇台語文書寫這條路已經行真久，亦出版真濟本册，伊的台語詩人身份建立佇伊的實積。詩就是心，台語詩親像任何語言的詩一樣，但因為台灣特殊的歷史構造，予殖民統治權力迫害、破壞，是受傷猶未復元的語言。有這種問題意識，才會當重建。講啊講，就講台語世界尚媠這款話，對台語文書寫無幫助。世界真大，每一種語言攏真媠，攏是使用民族的言靈，世界的詩也有值得觀照的風景。

台語詩的書寫，有語言問題，嘛有詩的課題。希望金順佇繼續的台語詩人之路，把握這款雙重性，不只詩情、詩想，亦佇詩的造型有講究，兼顧poetry佮poem。眼光要放遠，心要闊。台語詩這條路是佇受傷的土地種樹仔，仰望看著暗暝有星佇樹頂閃熠的路。種作的人、觀看的人，作伙形成一種媠的生態，一款詩的新風土。台語詩的文學、文化會佇台灣人的心內形成感情佮意志的光。安呢，鼓勵金順，並為這本詩集作話頭。

【推薦序】

以種作的心，為台語詩開拓新風土

――序介陳金順詩集《阮兜隔壁彼間美術館》

◎李敏勇

金順是一位真打拼的台語文學書寫者。三不五時，我會收著伊寄來的新册。即擺，伊寄《阮兜隔壁彼間美術館》的詩集稿予我，問我會當寫一篇話頭麼。伊擱講：「字數濟少，由你主意」。我一向關心台語文書寫，前幾年，我同年的朋友鄭福田，是太陽能産業茂迪公司的創辦人，往生了後，紀念伊的基金會為鼓勵台語文書寫，舉辦「生態文學獎」獎勵台語文詩，我受託為召集人。我想講三人評審小組，若召集人不變，其他兩人每年輪流變動，也可以擴大觀照面...

【話頭】
李敏勇：以種作的心，為台語詩開拓新風土
陳金順：寫詩25年

【01孤行詩】
蝹
柔
反
兵
寒
燙
雺
真
善
美
【02兩逝詩】
秋節
菝仔
紅豆湯
柚仔
熨衫
早頓
糞埽車
區間車
風颱
教師節
古典音樂會
查某人日
孔廟
圖書館
飛閱文學地景
燦爛時光
重陽
茶甌
榜單
博愛座
時鐘
野球賽
樹奶印仔
立冬
文字獄
目睭
幼稚園
電影導演
編劇
蘆筍汁
【03七股囡仔】
喜鵲
十一月
聖誔樹
額紋
粉紅手套
落雨聲
七股海味
圍爐
心經
七股囡仔
【04相思恆春】
相思恆春
楓港海墘
蘭嶼海歌
海景
思念安平港
阮兜隔壁彼間美術館
藍晒圖
行過米街
南鯤鯓文學暝
新港社
北港暝
田中短歌
笑面花
悠悠淡水線
【05田野調查】
鴨母王
射日
尪架桌
田野調查
德章
大樹
火燒島印記
這个冬天遐熱情
宛然
跤踏實畫
初心
肚臍帶
詩聲
鐵馬騎過文學館
詩人本色
飛天
檸檬蜜茶
進步份子
薄日清水
【06自由的天】
詩心
詩行
斑芝樹跤吟詩
南門城頂吟詩
十行詩
飛烏
秋歌
月影
畏寒
自在
自由的天
出世
古意
老街鹹酸甜
水藍
炮仔花
滴答滴答
人像
藝術無價
【07春夏秋冬】
春夏秋冬
新穎
天人菊
榕仔樹
彼欉榕仔樹猶咧喘氣
落葉聯想
露水茶山
山林變奏曲
大象
對舞
粉鳥
海鳥話
生湠
園裡箍圍意志
北風的要求
荒郊野外
黃酸雨
變面
補天
燒烙的地球
【08春雨稀微】
心景
心情
品茶
品味
是非
言語
喝咻
目屎
望日
春風
雨來
春雨稀微
內奶
棋子
面冊
風吹
毋通
決鬥
考試單
讀人
鉸刀
重讀生
咱猶未度晬
新情
輕視
記持是一尾魚
三八毋是歹瓜厚子
骨力是上鮮的景緻

【話頭】
李敏勇：以種作的心，為台語詩開拓新風土
陳金順：寫詩25年

【01孤行詩】
蝹
柔
反
兵
寒
燙
雺
真
善
美
【02兩逝詩】
秋節
菝仔
紅豆湯
柚仔
熨衫
早頓
糞埽車
區間車
風颱
教師節
古典音樂會
查某人日
孔廟
圖書館
飛閱文學地景
燦爛時光
重陽
茶甌
榜單
博愛座
時鐘
野球賽
樹奶印仔
立冬
文字獄
目睭
幼稚園
電影導演
編劇
蘆筍汁
【03七股囡仔】
喜鵲
十一月
聖誔樹
額紋
粉紅手套
落雨聲
七股海味
圍爐
心經
七股囡仔
【04相思恆春】
相思恆春
楓港海墘
蘭嶼...