收藏
▎後錄
０
一本出版品愛感謝的人誠濟，感謝阿元佮厝內人的陪伴、鄭順聰老師的牽抾、國藝會鬥支持，多謝王昭華老師和我做伙一字一字斟酌，嘛感謝好朋友楊芳嬋、黃淑姿、楊智傑佮編輯Amber的幫助。
感謝已經做仙的顧德莎顧二姊，閣有永遠佇我心肝底的貓仔茼蒿先生。
１
地球有一个所在，離陸地上遠、上歹行跤到，人共號做「拈魔點」（Point Nemo，華語是「尼莫點」），正式的名稱是「海洋難抵極」（oceanic pole of inaccessibility）。伊佇南太平洋的中央，你若是對這个海域欲去到上近的小島，至少愛划兩千八百公里才會到位，閣無一定揣會著人類，所致予人講是世界上孤獨、上窵遠的所在。毋過，你若有翼股會當飛，差不多四百公里就有可能拄著國際太空站，差不多是對臺灣頭飛到臺灣尾的路程爾爾。當當你拍拚擛翼，你無定著會看著人工的落屎星，天邊畫巡，一个一个，輾落去彼个「拈魔點」，因為伊是太空墓地，無人行跤到就較無要緊，歹去的、篩掉的、到期的衛星佮太空船，攏送入去這个無人的墓地。
伊是一切的終點站。
我有時感覺家己佇咧彼个拈魔點，四箍圍仔一个人都無，浮浮沉沉，毋管是母語抑是議題，按怎划船都划袂到位。我換共創作的翼股插咧，飛向日頭，蠟紙並無熔去，毋過我記錄的時代，已經開始墜做流星矣。
時代當咧換布景，跤步緊甲逐家強欲綴袂著，無變化的是，受壓迫的人佮土地猶原受壓迫，眾人的眼神總是跟綴慾望，咱猶是咧問家己是啥人。
總有一工，拈魔點的深海，會累積一層閣一層，和追求發展追求自我有關係的故事，毋知彼時敢有人閣想欲理解無。
２
咖啡廳嗤嗤呲呲，逐桌攏有誠濟話通講。我坐佇壁角，電腦強欲予我繩甲戮空，猶是一片白蔥蔥。
「有啥物話欲辯解的？」頭殼內的法官開喙。
「我煩惱家己是毋是咧利用、消遣遮的議題。」袂輸新婦仔的我細細聲仔。
「這是創作，敢毋是？」律師佇邊仔鬥相共。
「我嘛煩惱家己寫了無夠媠，顛倒予議題失去光彩。」我的自信愈纏愈細粒。
「這是你的人生，你的觀點，敢毋是？」律師並無放棄。
「無請你講看覓，代誌是按怎開始的？」法官擋袂牢來牽抾阮的方向。
欲按佗講起才好？彼場轉來故鄉講台語的環境教育演講，抑是二姊上尾上車的背影？或者是，算袂齊透有偌濟暗暝，因為各種消息，心肝頭凝甲袂睏得，無寫出來袂使，無行出來行動袂使。閣有偌濟改四界走傱、無閒tshih-tshah，轉來到厝，啥物都寫袂出來。
也有失去十八冬的陪伴，無貓仔佇咧身軀邊的時陣，無才調寫，也險仔無法度正常生活的日子。
到底，這本詩集是按怎開始，為著啥物開始的？
「就我無細膩徛佇彼个位置，看袂得過，就按呢開始寫／戰鬥矣！」欲自頭講起，不如共我這个人囥佇歷史地理的經緯線內底，一切就解說會通矣！
３
這世人上緊張的一場演講，是二空一空年年尾對臺北轉去故鄉，宣傳反國光石化運動。彼時我佇荒野保護協會做志工，反國光石化、保護白海豬炒甲熱怫怫，捷捷咧開會，一改會議當中，主席拜託逐家攏愛四界揣機會去宣傳，我應好。煞梧知欲按怎收紲，志工朋友建議我轉去嘉義演講，我ti-ti-tu̍h-tu̍h毋敢一下答應，離鄉傷久，這號要求使人驚惶。想規半晡，確實有需要，確實有機會完成，若是按呢，確實是徛佇咧彼時彼搭的我愛去做的代誌。
我提出十二萬分的勇氣，拜託爸母替我邀請親情朋友，來聽我分享國光石化對環境的影響，查某囝奇怪的請求竟然得著同意，我誠好運，有阿舅替我揣場地，有阿伯送花籃，閣有阿姨叫是我結婚欲送我禮物。我緊張甲袂食袂睏，蹛臺北台語拍毋見幾若冬，是欲按怎用台語紹介環境議題，而且對象閣是看我大漢的序大，逐工攏是目屎流目屎滴，那煩惱那練習。
徛佇台頂猶未開始，手共mài-kù捏甲出汁，台跤齊齊是熟識的親情序大，佳哉落尾有順利結束。我知影我誠好運徛這个位置，就有這个所在愛負擔的重量，我想欲替無法度講話、無人注意的性命出聲，畢竟，我看著矣。
看著就毋甘，毋甘就行動。
毋知影是臺灣人普遍的個性，抑是我這號人（長女病）的性情，重感情、欠自信、無人做就家己塌落去做。一改閣一改的行動，反核、古蹟保存、鐵路立體化、MeToo、大罷免，毋是啥物重要角色，只是徛佇佗就去做彼號工課。
這時，我徛佇母語佮社會運動的拈魔點。
敢是孤遠的創作起點，敢是起飛落地的文明總站。
未來無底參考，我越頭看臺灣人的跤跡，攏總是合該然徛起的不平。親像苦難佮熱情相依倚遐自然，對生的熱情帶來死的苦楚，嘛佇苦難當中感受對性命的熱愛。
略略仔安心矣，我只不過是行來到遮，做我應該做的代誌，共臺灣歷史佮土地苦疼交纏的歌詩寫落來。
啊你咧，你佇佗位？
瀏覽器，→並以Chrome開啟我的電子書櫃後，點選『線上閱讀』，即可閱讀您已購買的電子書。建議使用 Chrome、Microsoft Edge有較佳的線上瀏覽效果。
2026專利防護中