名人推薦：敲鐘擂鼓推薦（依字首筆畫排序）
A編工事中
王子碩｜聚珍臺灣總監
王昭華｜臺文作家
林建農 ｜文史工作者
陳慧勻｜雞屎藤舞蹈劇場副藝術總監/淡江大學通核中心副教授
陳瀅州｜中正大學台文創應所兼任助理教授
黃雅貴｜國小社會科老師
鄭順聰｜臺文作家

這才是咱欲愛的心適氣 鄭順聰

　　古早古早以前……毋著，現此時是二十一世紀啦！佇滿四界攏鼻會著肉燥味的府城，有一位蹛佇有樹仔的巷仔內的藝術家，用「水印木刻」風格來畫圖，叫做洪福田。
　　伊人真鐵齒，今全球化的世界，創作者都出國留學、共國際上鑠奅的潮流引來臺灣，外國的月娘好親像較圓……伊煞守踮臺南，浸佇臺灣的民俗美學內底，閣學西川滿手工冊裝釘的精神，雕琢做伊家己的手路：為冊配圖，印藏書票，閣有海報、曆日等視覺之輸出，甚至設計規組的年節禮盒，創作家己的繪本。按呢做濟做久，做甲好甲，予臺文里長伯仔順聰我共號做「福田流」—這流水閣不止仔大港，流去做悠遊卡、提款卡，甚至佇桃園市兒童美術館和誠品書店出沒！
　　福田伊人就無愛出門，規工踮厝恬恬食三碗公毋知咧創啥，定定予里長伯仔我掣一趒，毋知伊紲來閣欲變啥物魍（báng）—這回這部《神仙府綺異誌》一下出就遮大隻蠓（báng） ，像故事內底的「八卦蜘蛛網陣」，共府城的信仰和傳說、地理和歷史、新聞和笑詼，全共網（bāng）起來，害我一下讀就纏佇咧「福田故事網」，走袂離，剝袂去，笑咍咍。阮查某囝看這个老爸毋知按怎無正常，趁我去洗身軀偷提來讀，一字一句用臺語唸出來。
　　這就奇囉！我逐暗睏前攏會看冊，看的冊百百款，查某囝連瞭就毋捌瞭過，煞對《神仙府綺異誌》有趣味？敢講這故事帶靈聖，通感應幼茈的靈魂，予咱人的囡仔性夯起來？我就共捎倒轉來，對阮查某囝大聲唸，阮兜的「中二」國中生竟然無走敢若飛，那食四秀仔那聽我用講古仙的氣口，綴故事來飛天鑽地，鏗鏗勍勍。
　　奇奇奇， 這本冊到底變啥魔術？會予大人囡仔「著網」，像牢佇網路內底，三工三暝搝袂出來—無遐譀啦！這故事是咧講小神仙一時失覺察，害規个仙界亂操操，佇空中戰來戰去險險仔袂收煞—我先莫煏空（爆雷） ，這囡仔古欲開破的是毋但人、連神明嘛會做毋著代誌，俗語講：「仙人拍鼓有時錯，跤步踏差啥人無。」做囡仔時，有時手賤有時無細膩，共小代誌舞做大事件，耍番仔火煞來火燒厝，咱人生的過程加減會犯錯。這本心適掛刺激的囡仔古，招你做伙來體驗，綴仙界的眾神明捙跋反，一件一件共天大地大的代誌收束收尾。
　　而且，袂輸布袋戲來扮仙、演義、捙拚、結局，囡仔大人透過趣味的站頭，活跳跳的角色，來熟似府城神明和廟寺的背景佮特色，閣有香境和所伊庇佑的，這是一本認捌府城信仰的臺文讀本。仝時，可比展開府城的地圖，綴神明來紙上行踏，走東西，傱南北，佇彼角勢徛佗一間廟，舊地號名之來源，捌發生的新聞事件等……當然，閣有予人流喙爛的府城點心，芳貢貢捀出來，喔！全好料的。
　　有請大仙黃震南審定，媠詞、俗語、故典規葩規葩鬥句，袂輸唸歌囉。欲學臺語讀這本就著，上好全共暗唸起來，臺文底蒂百面一等一。
　　毋是見古喔，二十一世紀「福田流」毋但自歷史和民俗流過來，伊的鋩角是欲來譬相現代人的困境，予咱笑咧笑咧目頭隨結起來：手機仔癮仙哥有敗害，交通利便嘛予傳染病無站無節，多元的時代按怎參詳揣對同……毋但是笑詼，毋但是智識，閣有予咱思考思量的大題目。
　　歡歡喜喜讀《神仙府綺異誌》，里長伯仔我煞愈來愈悲，是按怎這本冊毋早早出來啦！自細漢講臺語的我，去學校受「國語教育」，是有真濟華語童書和故事讀物，煞和我的生活離蓋遠。自本咱臺灣款的生活，就是人和神明無隔界，廟埕定定搬布袋戲，擔仔的好食點心滿滿是，老大人講古是天地開闊，心適帶智慧，天天開心是遐爾仔樂暢，偌愛這款好日子──煞等到我大漢，連阮囡仔嘛大漢矣，臺語囡仔冊才愈出愈濟，譬如我家己寫的《大士爺厚火氣》，閣有福田配圖的《膨風龜大冒險》、《黃金陣佮烏風幔》，按許丙丁的板嘹來拍拍，攏是「小封神宇宙」的行星。
　　接潘元石的版畫傳承，紲許丙丁的講古理路，洪福田這改家己畫圖家己寫字，創作這圖文合一的《神仙府綺異誌》，和伊進前濟濟作品相敆，會當講「福田流宇宙」就來做成。
　　呵咾到遮，某人的尾錐會翹上天，做讀者的我讀無夠氣，貪心貪心：一本無夠，兩本提來鬥，三本才是老（láu）。拜託拜託，請鋪排做系列一本一本出，相信眾讀者攏會來贊聲交關啦！

這才是咱欲愛的心適氣 鄭順聰

　　古早古早以前……毋著，現此時是二十一世紀啦！佇滿四界攏鼻會著肉燥味的府城，有一位蹛佇有樹仔的巷仔內的藝術家，用「水印木刻」風格來畫圖，叫做洪福田。
　　伊人真鐵齒，今全球化的世界，創作者都出國留學、共國際上鑠奅的潮流引來臺灣，外國的月娘好親像較圓……伊煞守踮臺南，浸佇臺灣的民俗美學內底，閣學西川滿手工冊裝釘的精神，雕琢做伊家己的手路：為冊配圖，印藏書票，閣有海報、曆日等視覺之輸出，甚至設計規組的年節禮盒，創作家己的繪本。按呢做濟做久，做甲好甲，予臺文里長伯仔順...

學捌台文正字的好時代

　　日本時代的作家西川滿，佇伊的作品《赤崁記》內底有寫著一段：「臺南人無啥愛惜家己的土地佮歷史」。予我感覺礙虐礙虐，引起我創作頭一本限定本作品《赤崁再記：我的西川滿》，自頭來熟似家己的土地，跤踏步、踅臺南、捌歷史，就按呢，開破我後來的創作思想，就是做一个創作者，愛佮家己的土地培養感情。
　　像我遮頇顢的人，哪有勇氣來寫冊？臺語本底就是爸母的話，編寫臺文的時，頭殼的畫面攏是阮阿母講話的模樣，但是會曉講煞毋捌字。足早就想欲來學捌臺文字，早期有冊無聲，買一堆臺語冊，用字、音標毋捌半个，嘛足濟種標音版本，喙唸出來嘛毋知影著抑毋著？提冊問序大人嘛無看過，欲問無地問，大部分家己看華文唸家己的臺語，阮母仔就是按呢讀讀看報紙的，猶毋過這種情形，後來造成誠大的副作用，就是會定定誤會用毋著字，實在無建議看華文唸臺語，後面學習正字的時會定認毋著字去。佇我的第二本限定本作品《七爺八爺ê歌》，佮短篇bàng-gà作品《小琉球之歌》、《秀蘭小姐欲出嫁》的臺文用字，就因為按呢用甲離離落落。這馬時代無仝矣，傍科技助贊，是學捌臺文上好的時陣，看著字袂曉唸抑是無確定，會使提手機仔查，放送聲音聽發音，予我有機會自學了後，出版臺灣鄉土繪本系列《十二生相之歌》、《神仙十二碗菜之歌》，原本閣來這本是欲來完成繪本三部曲，就想著這部囥足久的故事，應該愛來完成矣。
　　算來這个故事的jdea都粒積十偌冬矣，資料佮想法攏囥佇電腦的一个資料夾仔內。斯當時的發想，嘛干焦一个初步的概念爾，上蓋原早是想講欲按算畫成尪仔冊，彼陣臺灣bàng-gà煞無時行，時間嘛一冬一冬過去，這幾年來，合作過袂少許丙丁老先生《小封神》的改編作品，才知影逐家攏受著仝款的影響。心內咧想的，是定著愛來完成一篇按呢的故事，佇「臺南400」接紲落來的「府城建城三百年」，毋知佗一條腸仔去想著，予我揣著收尾矣，就開電腦來拍字，袂曉的字就查「教育部臺灣台語常用詞辭典」。無論道教精神、 宗教民俗，抑是臺南府城相關歷史、文化、古蹟、人文、水文、地理、俗語等等，攏愛重新認真做功課，閣去收集一寡趣味的臺南宗教新聞，想講欲按怎來敆做一篇合理的故事。三寫四編幾若回，予我頭疼甲險險掠狂蹔齒盤。毋過真靈聖，定定寫甲㧎牢咧的時，我本底捎無臺南歷史的問題，冥冥之中家己會自然解開，一回接一回的故事就會順順序序，奇奇奇。
　　佇我做囡仔的時，所感受的臺語語境，無像現此時華語透濫甲，連我家己嘛去予穢著，有一寡加強語詞的孽譎仔話，氣口較接近原初的生活感，這馬較罕咧按呢講的臺語，賰阮阿母這沿七十歲以上的序大人會曉講，所以我編寫用字有刁工共遮的詞揣轉來。原本想講用字已經足認真做功課矣，毋免予審定老師傷頭疼，交稿了後，佮審定老師佇線頂同齊對稿的時，才知影啥物叫做「綴袂著車尾燈」的感受，親像小學生寫作文予老師改甲規篇紅記記，予我的跤頭趺都軟去。有伊的審定，親像故事內底的神仙幫贊—戲無夠，仙來鬥—審定老師真正有影佇咱臺灣各方面的知識有真澈底的研究，用字閣較倚我心目中理想的臺語語境，予這个故事的臺文用字閣較媠氣，閣較有土地感，足讚的。
　　閣再翻頭講編寫這本故事，影響上大的是「信仰」。人生的過程若搪著無順序，袂得過的，大都會寄望佇信仰，但是隨時代科學的進步，一寡想法開始有相礙。我去讀遮的道教資料，發現原早的信仰精神，干焦是一種個人的思想追求佮自律，較成人生哲學，佮這馬群體的宗教活動無啥仝款，毋是偶像崇拜、被動式的寄望。我想想咧才來理解一个簡單的概念：就是「信仰」在個人，是思想；「宗教」是群體，是行為，兩个分開想就袂複雜矣。複雜的往往攏是人，人是百百款，都有家己的價值觀，尤其愈濟人做伙的時，應該愛共利益大眾囥代先，起私心顛倒會害著公眾，終其尾家己嘛是受害的，這就是這个故事是按怎無主要的主角，無分族群，先來慢到，愛互相團結，開枝湠葉為咱欲共同生活的土地。
　　最後，感謝天地，感謝臺文審定震南老師，鬥跤手完成這本冊，共同獻予咱上愛的土地。

寫佇2025年2月12日　蘭心巷書房

學捌台文正字的好時代

　　日本時代的作家西川滿，佇伊的作品《赤崁記》內底有寫著一段：「臺南人無啥愛惜家己的土地佮歷史」。予我感覺礙虐礙虐，引起我創作頭一本限定本作品《赤崁再記：我的西川滿》，自頭來熟似家己的土地，跤踏步、踅臺南、捌歷史，就按呢，開破我後來的創作思想，就是做一个創作者，愛佮家己的土地培養感情。
　　像我遮頇顢的人，哪有勇氣來寫冊？臺語本底就是爸母的話，編寫臺文的時，頭殼的畫面攏是阮阿母講話的模樣，但是會曉講煞毋捌字。足早就想欲來學捌臺文字，早期有冊無聲，買一堆臺語冊，用字、音標毋捌半...

作者序　學捌台文正字的好時代
推薦序　這才是咱欲愛的心適氣──鄭順聰

頭齣　扮仙賀凡間吉慶，華麗島大醉八仙
第一回　蓬萊仙島神仙府，藏書老仙佮弟子
第二回　剪蟲童子討冊去，紅顏薄命仙跤亡
第三回　老仙張和平主義，眾龜暗頭偷魔罐
第四回　龜仔精戲弄仙翁，魔毒湠開全仙府
第五回　神仙府線頂會議，諸仙眾神議論紛
第六回　帝爺公本領發揮，夜婆受冤押鷲嶺
第七回　鯉魚公防疫宣導，驚得愛徒惹大禍
第八回　眾仙神興煉金術，老仙求援皆無果
第九回　眾龜仔精感自責，赴牛屎埕救禪姑
第十回　傳口信入螿蜍口，孝孤禪師獻詭計
第十一回　禪師訪鯤鯓老祖，求援水族鬥相共
第十二回　七夕亂點鴛鴦譜，天河相會非良人
第十三回　風聲嗙影放紙虎，諸仙眾神起冤家
第十四回　袂得癮仙丸煉成，肉禪庵卜卦解疑
第十五回　姑情大聖做公親，事成獻上生理術
第十六回　夜救仝門夜婆姑，情愫發酵曖昧情
第十七回　眾神決戰三界壇，冤家害死猴齊天
第十八回　驚動地牛大翻身，蜘蛛網陣罩鳳凰
第十九回　勇獸虎爺求援助，觀音媽指點迷津
第廿回　吸元氣爆鯤鯓亡，烏靈龜仙化石碑
第廿一回　膨風夜婆二禪情，生離死別悟皈依
第廿二回　白牡丹使迷幻術，石馬兩精運多厄
第廿三回　巨獸對較威八方，回歸祥和神仙府
第廿四回　真人下降宣御旨，冊封仙籙封城榜

本書附華文翻譯版，請由另一頭閱讀

作者序　學捌台文正字的好時代
推薦序　這才是咱欲愛的心適氣──鄭順聰

頭齣　扮仙賀凡間吉慶，華麗島大醉八仙
第一回　蓬萊仙島神仙府，藏書老仙佮弟子
第二回　剪蟲童子討冊去，紅顏薄命仙跤亡
第三回　老仙張和平主義，眾龜暗頭偷魔罐
第四回　龜仔精戲弄仙翁，魔毒湠開全仙府
第五回　神仙府線頂會議，諸仙眾神議論紛
第六回　帝爺公本領發揮，夜婆受冤押鷲嶺
第七回　鯉魚公防疫宣導，驚得愛徒惹大禍
第八回　眾仙神興煉金術，老仙求援皆無果
第九回　眾龜仔精感自責，赴牛屎埕救禪姑
第十回　傳口信入螿蜍口，孝孤禪師獻詭計
第十...