名人推薦：

推薦序1：佇行走中開展感官，佮土地深度對話／新北市鶯歌區永吉國小校長──鍾信昌

　　旅行的本質，到底是地理空間的徙振動，猶是心靈認知的轉變？當代旅行理論學者Carl Thompson捌講過，旅行文學是一種「真實和想像之間的混合文本」。讀完這本《旅行文學：以臺灣為例的經驗佮書寫》，讀者會當發現，臺灣這粒島嶼佇無仝時代文人的筆下，毋但是會當治理的疆域，閣較是充滿溫度和氣味的感官場域。

　　這本冊毋但是一部臺灣書寫的編年史，閣較是一場𤆬領讀者軁過時空的「五感實踐」。本文作者，我亦師亦友的俊陽老師，巧妙共臺灣旅行文學劃分做幾个關鍵層次：對明清時期的探勘佮疆域觀察，到日治時期的現代化調查，閣到戰後散文內底的流浪漂泊，最後歸結佇當代食食和城市生活的深度描繪。

　　佇歷史的長河內底，咱看見陳第佇〈東番記〉裡初探異地的驚異，郁永河佇〈裨海紀遊〉內底結合科學佮詩性的探勘，和黃叔璥佇《臺海使槎錄》中制度化的治理視角。遮的文本證明「行走」就是智識生產的過程。進入日治時期，旅行閣較予人賦予現代性的修辭，透過張麗俊、林獻堂等人的日記，咱讀著殖民體制內底，地方菁英按怎透過旅行揣轉來自我的文化主體性。

　　這本冊上蓋使人入迷的部分，是對「感官經驗」的深刻探討。旅行毋但干焦是看見風景，閣較是聲音、氣味佮味覺的交織。作者精準指出，當代作家親像洪愛珠佇《老派少女購物路線》內底，共菜市仔轉化做味覺的地圖，抑是葉怡蘭佇日常煮食內底實踐「生活旅行」。遮的書寫予咱意識著，旅行無一定愛佇遠方，只要開啟感官，日常的街仔路、巷仔內佮飯桌仔，攏會當成做文化再生的場域。

　　另外，冊內底嘛關心數位時代的轉向。當 YouTube、Instagram 取代傳統導覽手冊，旅行敘事變甲閣較碎片化而且充滿影像動感。不而過，無論媒介按怎變遷，就親像洪伯邑教授所提倡的「田野倫理」：旅行者必須願意停落來聆聽，用尊重和互惠的姿態共地方的大門拍開。

　　這是一本邀請讀者「𤆬身體去閱讀」的冊。伊共咱講，每一段旅程的文字攏咧塑造世界，同時嘛咧排除抑是召喚某一寡聲音。透過這本冊，咱會當學會曉按怎對視覺中心轉向多感官的參與，佇山林、城市、離島的行走內底，重新連結人佮土地的關係。

　　誠心推薦這部作品予每一位佮意行走、疼惜臺灣這塊土地的讀者。

－－－－－－－－－－－－－－－－－－－－－－－－－－－－－－－－－－－－－－－－－

推薦序2：台文開竅，感受臺灣／活水來冊房版主、新北市三峽區龍埔國小老師──黃震南

　　有人講「冊愛加讀，所在愛行透」，毋過若是會當共「行路」的經驗，化做「寫冊」的學問，彼種境界就閣較懸。我佮俊陽老師熟似十外冬，較早伊就不時揣我替伊寫新冊的頭序，寫到尾我攏強欲記袂牢到底寫過幾本矣。有一擺，為著確定伊頂一本冊的名，走去博客來網路書店搜揣，結果發現佇一排台文作品內底，竟然有插幾本旅遊冊。彼陣我閣想講應該是「堂的兼蟯的」──仝名仝姓爾，後來才知影，原來這就是俊陽老師的別才：旅遊專家！

　　俊陽老師毋但有食福、𨑨迌內行，閣進一步共旅遊提升做一門學問。伊佇臺灣師範大學通識中心兼課，用咱上親切的台語教冊，教學生按怎欣賞「旅遊文學」。伊將台文的底蒂佮旅遊的專業智識結合，這種「手骨寫台文、雙跤踏旅途」的實作，實在予人呵咾甲會觸舌。啊這本《旅行文學：以臺灣為例的經驗佮書寫》，就是俊陽老師這幾年來，用心計較、嘔心血編寫的成果。

　　這本冊上顯目出擢的所在，就是伊突破傳統旅行書寫「怙看的」的束縛。現代人出外旅遊，定定是「翕相機先食」，逐家趕緊緊去「頓khà-looh」、翕相，追求的是目睭的享受。毋過俊陽老師佇冊裡強調，建立「地方意識」的關鍵，顛倒是佇耳空聽、喙舌啖佮鼻空鼻。伊用Carl Thompson的理論做基礎，𤆬領讀者去聽「聲音地景」，去揣「味覺記持」。按呢的旅行，除了是地理空間的遷徙，嘛是身軀佮土地深深的搭峇。

　　冊內底閣用足大篇，清點臺灣旅遊文學的頭來尾去。對清朝郁永河〈裨海紀遊〉彼種敢若咧探險的自然描寫，到日本時代文人寫佇日記的日常生活；甚至連這馬洪愛珠《老派少女購物路線》彼種都市人的生活對話，俊陽老師攏一一整理好勢，展現出臺灣人「按怎看」的演變史，咱會當看著咱的祖先佮現代人，是用啥款的角度來欣賞這塊土地。

　　讀到冊稿後半段，講著大稻埕街仔的感官想像，到甲旅遊會當促進文化修復佮再生，我心肝底感覺特別親切，嘛想起一段往事。

　　回想1990年代，阮阿爸捌佇故鄉附近擔任「社區營造」的解說員。彼陣我和阿母定定去鬥相共，招待遊客兼綴咧聽導覽。阿爸真有喙水、講笑詼袂輸竹管倒豆，我攏恬恬佇邊仔觀察遊客的反應，偷學欲按怎共地方的故事講予人聽會落心。

　　十冬後，蒜頭糖廠因為納莉風颱無閣做糖，開始轉型做觀光。阿爸負責規畫路線、安排解說內容，創立「坐五分仔車聽導覽」的特色。彼陣我讀大學，過年期間遊客濟甲豉人膎，一工愛開十外幫車，導覽人員個個講甲喉嚨梢聲，阿爸就共我這个「祕密武器」搝來代班。

　　超過十冬的時間，我逐冬過年攏會佇五分仔車頂，共遊客紹介嘉南平原的風景。彼當陣的我，就是俊陽老師冊裡講的「呈現旅遊樣貌」的人──我掌握欲予遊客看啥，嘛替遊客詮釋景點的意義。這个親身的經驗，予我佇讀這本冊的時，感覺一字一句攏敲佇我的心肝頭。

　　這本冊毋但有理論，閣蓋實用。冊內有提供誠具體的創作方法，教咱按怎運用感官來描寫，甚至連寫「食食散文」的見本模仔都攢好勢矣。這是俊陽老師寄予咱的一封書，邀請咱做伙開竅，重體驗旅行的感受。

　　俊陽老師用這本冊講予咱知，旅行毋是走馬看真珠爾，是用人生體會土地的氣味。誠心推薦這本冊予每一位愛臺灣、愛文學、嘛愛旅行的朋友。