收藏
二手徵求有驚喜
Kā 台語文學thiⁿ ke-hóe
Tēng-pang Suy aka Chiu
2001年有一个機緣hām台南人劇團合作poaⁿ台語戲，chiah kah戲劇結緣，hit-chūn in有phah算beh the̍h西方一寡khah經典ê戲齣來做「西方經典劇作台語翻譯演出計劃」，tī in beh chhōe我ê恆春民謠ê sai--ê（朱）丁順伯做伙去poaⁿ Hi-lia̍p（希臘）悲劇《安蒂岡妮》（Antigone）ê時，chhiàⁿ我用七字仔四句聯ê文體寫戲--lìn歌隊（chorus）beh唱ê歌詩ê歌詞，thang hō͘我kap丁順伯配恆春民謠tiàm戲--lìn彈唱，chiâⁿ做歌隊ê演員。自hit-chūn起，台南人劇團liân-sòa邀請我kā幾nā phō西方經典劇作翻譯做台語文，chiâⁿ做in poaⁿ戲ê劇本，chia ê劇本有西方文學史頂koân上出眾出腳ê文學家之一ê William Shakespeare ê Macbeth （台譯：《神姊奏鳴曲—Macbeth詩篇》），Éire（愛爾蘭）戲劇家mā是hàm-kó͘ （荒誕）派戲劇ê代表人物、Nŏ͘-bē-luh（諾貝爾）文學賞得主Samuel Beckett ê Endgame（台譯：《Soah局》），Bāng-ga-la族（孟加拉）文學家、頭一个得tio̍h Nŏ͘-bē-luh賞ê亞洲人Rabindranath Tagore ê Mayar Khela（台譯：《虛幻ê gè-muh》），有「喜齣之父」kiau「舊喜齣王子」稱號ê古Hi-lia̍p喜齣作家Aristophanes ê Lysistrata（台譯：《Lysistrata：Cha-po͘人kap cha-bó͘人ê戰爭》），Samuel Beckett ê Foot falls（台譯：《Kha步聲》），România（羅馬尼亞）kiau法國ê劇本作家、hàm-kó͘（荒誕）派戲劇上有名ê代表之一Eugène Ionesco ê Les Chaises（台譯：《椅á》）kap台灣作家張文環ê《閹雞》。
Chia翻譯好ê劇本，khioh-khí 《虛幻ê gè-muh》kap《椅á》hit 2 齣lia̍h-gōa，chhun--ê nā m̄是bat tī台灣ê國家戲劇院，無tō是bat tī台南ê二鯤鯓砲台（億載金城）、台南人劇團ê戲工場、台南市文化中心a̍h是法國巴黎ê台北文化中心、亞維儂外圍藝術節（Avignon OFF）走索人劇場（Le Théâtre Funambule）chia ê 所在poaⁿ--過，mā得tio̍h chiâⁿ好ê風評hām tio̍h賞ê肯定、鼓勵，m̄-nā建立台南人劇團真特別ê表演風格，開拓台語文學新tiám-tiám ê風貌，mā hō͘ koh-khah chē人瞭解台語chiâⁿ做文學語言ê實力，put-lî-kò真可惜是chia ê劇本lóng無機緣thang出版，hō͘ chia經典ê文學作品tiàm台灣釘根生湠。好ka-chài，文化部chēng chhui-sak《國家語言發展法》立法kàu-taⁿ，tō真piàⁿ-sè leh鼓舞ta̍k-ê傳承、復振國家語言文化，運用國家資源補助台語文學作品ê產出，今仔日chiah有chit-ê機會hō͘文化部補助，來完成出版chia ê劇本ê心願，m̄-koh因為一寡in-toaⁿ，lo̍h尾tō ùi內底kéng《神姊奏鳴曲—Macbeth詩篇》kap《Lysistrata：Cha-po͘人kap cha-bó͘人ê戰爭》chit 2齣先來出版。
Tī leh寫補助計畫ê時，想講nā kan-na出版紙本ê冊，tiāⁿ-tio̍h bē-tàng ka-nn̂g展現chit 2齣戲迷人ê所在，án-ne tō無chhái兼phah-sńg咱想beh kā西方經典作品用台語流傳--lo̍h-lâi，hō͘ koh-khah chē人知影台語chiâⁿ做藝術語言hit款幼路、súi-khùi ê特色ê想法，thang顛覆pháiⁿ心人年年月月利用戲齣，phì-siò͘ⁿ、歧視台語ê惡質kiâⁿ-chòe，hêng咱台語優秀本質ê面模仔，m̄-chiah計畫kō͘有聲冊ê法度來出版，kā劇本透過人聲tàu-tah ê súi-khùi表演hō͘伊活--khit-lâi，來達kàu咱心肝內想beh完成ê目標，干證台語m̄-nā是一款社會te̍k ê生活語言niā-niā，koh-khah是一款ē-tàng cha̍p-chn̂g表達人類感情世界、哲學思想、文學思維ê藝術語言、科學符號。
Kā chia西方經典劇本翻譯做台語文，kō͘有聲冊ê法度出版ê想法計畫妥當liáu後，咱tō起手chhoân辦讀劇錄音ê大工程，tú好tī chit-ê sî-chūn，咱熟似一群對復振、傳承台語有大pak熱情心肝ê友志──蔡政君老師、周佳穎小姐、顏雨詩老師、康順添老師、劉文正老師、李宛青老師、連心郁小姐、白祐瑄老師、張苡薰小姐、陳宥瑋先生（kō͘名姓台語羅馬字ê順序安排）──因為ta̍k-ê大力tàu-saⁿ-kāng chiah順利完成chit項大工事，我想beh借chit篇序文kā ta̍k-ê說ló͘-la̍t、講多謝，chok感謝ta̍k-ê無惜艱苦ê真心sio-thīn，感恩ah！
各位貼心ê友志。Khioh-khí頂koân hia sio-kēng ê友志lia̍h-gōa，tī chia mā beh kā有聲冊ê製作人章羣先生說ló͘-la̍t，伊m̄-nā是chit 2齣戲讀劇錄音ê錄音師，mā是kui-ê作品後製作ê專家師傅，伊ê角色chhan-chhiūⁿ是chit套冊ê產婆，今仔日chit 2 齣戲nā無伊專業ê幫贊，tiāⁿ-tio̍h bē有chiah-nī jió-to͘h ê品質kap ta̍k-ê saⁿ見，有影chok ló͘-la̍t章羣先生ê 用心tàu-saⁿ-kāng。
Chit套冊雖bóng有chē-chē友志kap專業師傅ê大力助贊，hō͘ in thang phiau-phiat出世，m̄-koh上關鍵ê是前衛出版社ê大力sio-kēng，nā無（林）文欽社長kap（林）君亭副社長ê支持，kan-na憑阮ê氣力是無才調成事ê，koh有出版社內底tam-tng hōaⁿ-pôaⁿ、美編、校對kàu印刷加工chia chē-chē khang-khòe hia 頂真kàu-kak ê 同工，tī chia同齊kā恁說ló͘-la̍t，感謝恁為tio̍h chit套冊ê phah-piàⁿ kiau付出，chok多謝--恁，感恩！
Lo̍h尾mā感謝文化部ê補助、sio-thīn，hō͘ chit套作品kō͘台語來kah台灣人saⁿ見，ǹg望chit套西方經典劇本翻譯ê台語有聲冊ē-tàng kā台語文學thiⁿ寡ke-hóe，hō͘台語復振ê火把koh-khah大pha koh-khah iām，來助贊台語復振ê元氣。
2025.6.4 tī台南安平
2026專利防護中