收藏
烏仁目鏡
猶佇做生態義工彼時，有一日食飽晝人略仔懶懶，無想欲行傷遠，干焦佇水池仔附近幌咧幌咧。靠踮洗石仔面的低牆圍仔邊，看錫蘭橄欖尖尾水珠仔形的花莓發甲密喌喌，一蕊一蕊生做誠古錐。水面倒照出光映映的日頭，幾若隻綠頭鴨仔泅過，紲紲牽出一沿一沿的水泱，親像一捾一捾美麗的袚鍊。
忽然間，目尾䀐著一个影，若像有啥物件咧振動？
身軀徙一下，越頭一下看，原來是一隻刺毛蟲仔。
柑仔色的身軀摻幾若支聳聳的白毛，毋知是啥蟲豸的囝？上蓋趣味的是伊頭前有一搭足大片的烏斑，雄雄一下看，袂輸掛一支大大支的烏仁目鏡。敢是日頭傷猛，猛甲連囡仔疕嘛知影出門愛掛烏仁目鏡？
我人生的第一支烏仁目鏡也是佇我細細漢仔。
對我來講，彼是囡仔時代上有氣味的記持。
應該是猶咧讀幼稚園的階段，阿公、阿姆佮阿母𤆬 我坐遊覽車綴人去進香，彼也是我的烏仁目鏡第一改出場。彼支目鏡佮胡適先生所掛的仝款是圓框的，不而過伊的是烏塑膠框，我的是金框。胡適先生通光的鏡仁是欲求證看淸伊所譬論的世界；我暗色的目鏡仁是欲自我催眠，通成做電視內底的大明星。
目鏡掛起來的我風神甲，不時學阿公面仔擔擔，鼻仔攝咧攝咧，閣愛用指頭仔共㧣較懸寡，才袂予傷冗的鏡框落落塗跤。我目鏡框咧一四界遮看遐看，看敢有啥人咧掠我金金看？上車也掛，落車也掛，心內的臭屁佮奢颺盡磅盡展，衝甲掠袂牢。
到底彼逝是欲去佗位進香？我已經袂記得矣；彼支烏仁目鏡對佗來的？我也無印象，干焦會記得彼支冰冰涼涼的金框目鏡，煞顚倒共我的心焐甲燒唿唿。佇猶無高速公路的年代，上北落南攏愛行縱貫線，路途若較遠，不三時著愛揣所在歇睏，予逐家落車去便所，尤其是香客攏略仔有歲的進香團。遊覽車若毋是停咧宮廟；就是順路的觀光地區，只要時間按較冗寡，閣會當hőng落去行行咧，食涼買名產。
彼日，遊覽車停好勢，阿母𤆬我去便所。較早的公共廁所攏是用跍的，下底是一條長長的溝仔，雖然有門通關也有隔間，不而過彼條已經貯袂少「黃金」的溝仔，自然也唌來袂少軁來軁去、四界鼻芳的胡蠅佇耳空墘厚話。我跤開開，迒過溝仔跍落去，明知下底是貯啥，也是擋袂牢心內的好玄，頭𩑾𩑾共探看覓。啥人知我一下犁頭，本成都掛袂眞絚的烏仁目鏡，煞對我的面，摔落去屎礐仔。
彼日，我予我的烏仁目鏡放捒佇一个毋知影名的歇睏站，一點仔就無留戀，無彩我遐爾仔愛伊，共伊惜命命。我大聲吼，目屎輾到規便所，掛烏仁目鏡成做大明星的夢，竟然予一陣厚話的胡蠅拍醒，實在有夠厭氣。
後來，後來是啥物款？我也袂記得矣。
我想阿公𪜶一定步數盡展咧共我安搭。
時代咧進步，這馬的烏仁目鏡形體百百款，食甲這个歲數的我嘛買過袂少，獨獨落落去屎窟的彼款金框圓形的毋捌閣買。毋是我共棄嫌，是因為我欲將獨一無二，上有氣味的烏仁目鏡，留予徛佇便所外口吼甲目屎流目屎滴的查某囡仔。
注蒜頭射
天氣一下熱，手彎就溼溼癢癢，不時愛用手巾仔拭予焦。拭咧拭咧，又去看著內底幾若點蹛院的紀念品，彼年佇臺大病院逐日注美國仙丹佮抽血檢查所留落來的痕跡，到今猶看現現。
較早我的身體嘛袂講眞荏，干焦自國中開始胃就無啥好爾爾。根據醫學研究：胃的好䆀佮情緒有關係，個性厚操煩𠢕緊張的就較會胃疼，我想我應該屬於這款。便若疼起來，腹肚就捧咧若西施咧捧心仝款，精差伊捧較懸；我捧較低，實在予阿母誠煩惱。有一站伊聽人講有𣻸 的食食較顧胃，就開始用當歸靑耆燖鱸鰻予我食，逐禮拜歇睏對學舍轉去，定著有一尾鱸鰻咧聽候我。有一擺綴伊去東勢街仔共一个老阿伯買鱸鰻，跍佇人店口亭仔跤的老阿伯，頭前彼兩口竹篾仔辮的𥴊仔蓋，一掀開，就看著鉛桶仔內的鱸鰻。揣無石縫通覕，註定是菜刀仔命的鱸鰻，看起來也無遐活骨矣。
鱸鰻買轉來掠入去鍋仔內用酒飼予醉，藥材摻好囥落電鍋，也就是講佇電源揤落進前的鱸鰻干焦酒醉爾爾。自頭到尾看著鱸鰻湯生產的過程的我，共阿母講我食甲誠飫矣，毋免閣燖矣。後來，阿母又對漢藥房報的祕方，搣規搣的胡椒粒櫼入去豬肚內底燖，莫講效果按怎，這味薟辣仔薟辣的胡椒燖豬肚，氣味有影袂䆀。
未嫁進前胃腸無好吸收較䆀較袂做肉的我，看起來也較瘦，講較好聽是瘦抽的『モデル』身材，向時也確實有人會佇街仔路㧣mè-sì予我，問敢有興趣去拍廣告？不而過若以新婦材的角度來看，這款體格難免hőng 憢疑瘦閣薄板敢發會出卵？好佳哉我瘦罔瘦，跤腿也袂細肢，結婚前無意中予未來的大家看著我穿短裙，毋但無嫌我穿插無夠大端，煞顚倒加分。
結婚了有一擺胃疼，大家倩車載我去民權路的內科予醫生看。佇猶無全民健保的年代，入去病院醫生看好等注射是標準的『SOP』，有時是注手股頭佮尻川䫌肉的細支射針，有時是注血筋，啊若發燒就愛吊大筒。向時的觀念是注一支射較快好，所致毋管是感著、落屎、腹肚痛，攏愛注射。
彼日，醫生看好吩咐愛注一筒血筋。已經疼甲頭眩目暗的我，乖乖仔坐佇有一塊軟墊仔通架手的椅仔頂，手䘼撆起來，予護理師將射筒內的金黃色藥水慢慢仔捒入我的血筋。彼筒金黃色的藥水我誠熟似，較早佇東勢的病院也捌注過，會隨認出來的原因是彼支射若注落規喙就全蒜頭味。
前幾工看著網路新聞寫講：日本、韓國當咧流行佇熱天注蒜頭射補充體力，煞予我想起這層代誌，只是毋知𪜶所注的蒜頭射佮我注的有仝款無？
好玄的我開始搜揣，原來𪜶彼支蒜頭藥水有誠濟bi-tábín的成分，也是注落規喙攏蒜頭味，才hőng 號做蒜頭射，講注了會當消除疲勞嘛食較會落。𪜶的蒜頭射有效無效我毋知影，毋過我所注的彼支確實有法度減輕我的胃疼，雖然猶是無通仔治本。
胃啊胃，你予兩个阿母攏操心過，到今猶動毋動就滯滯無爽快，到底愛按怎共你惜？你才會無煩無惱，袂烏白想烏白疼？
好歹字運的盲腸
讀崇倫國中的時，前兩年猶是男女仝班。第三年，學校顧慮著未來的聯考，共阮照成績男女分班，一下分；分做三段，前前後後讀冊的氣氛也差眞濟。文科是我的本，若拄著理化和數學，定著雙手攑懸家己認輸，掩來扯去的分數，我排佇中橛，讀到畢業。
當咧轉大人彼坎站，個性難免龜龜鱉鱉，二年仔查埔查某做伙上的某一節課，實在也眞礙虐，若體育課穿運動衫走運動埕，才是討厭。貼身的質料，予當咧發育的奶仔看愈明顯，尤其是較豐滿的女同學，一下走，喙𪁎 的查埔就佇邊仔那喝「趒咧趒咧」，有夠作孽，一半个仔猶未開始穿內䘥仔的，也著歹勢甲掩掩揜揜，伸手那閘。所致彼時我足驚hőng 注意著，好歹攏盡量佯無聲。
有一學級的工藝課愛鉤一跤便當袋仔，學校統一買米色的na̋i-lóng線，形體也愛按老師的規定。照理講，有一个誠𠢕刺膨紗的阿母，這功課應該也無啥困難才著，若無愛家己舞，加加是擲予老母，兩三下仔就好勢溜溜。偏偏我竟然共這層代誌放袂記，一直到欲予老師檢查拍分數前的下課，才想起來。看仝班的人，作品紮咧行去工藝教室的我，開始起驚，想著男同學恥笑的形就足無愛的，急甲足想欲去挵壁。
現看都欲摃鐘矣，我銀角仔拈咧，走去教務處外口敲公共電話轉去共阿母講我腹肚疼，毋知是毋是盲腸的關係？
前幾工仔腹肚邊疼疼，阿母𤆬我去五權路的內科hőng看，醫生遮遐揤，判斷我是慢性的盲腸炎，先開藥仔予我食，才閣繼續觀察。大兄和三兄攏捌開過盲腸，阿母也有經驗愛按怎處理矣。我電話掛掉，行入辦公室向導師請假，紲落轉到無人的教室，冊揹仔款款咧轉去厝裡，阿母隨倩車載我去豐原病院急診。
去到病院，醫生看好辦蹛院，吩咐準備開刀。
病房猶未安排好勢進前我徛佇懸樓的手術房外口聽候，對玻璃窗看車路的人行來行去，心肝又閣氣又閣驚。氣家己無代無誌舞甲這款地步，若較大方寡去上工藝課，就毋免hőng 𠞭 一刀矣。想著阿兄講過的彼支針頭長長，對龍骨注落去的半身麻醉藥就驚甲爍爍顫，心臟強欲衝過嚨喉蒂仔跳出來。壁頂的秒針輕輕仔徙一細格；我的心就出大力趒一下，佳哉彼時猶少歲，心臟猶會堪得捙跋反，干焦後悔甲足想欲對樓頂跳落去。
已經無退路矣！我開始安慰家己：時間總是會過去，聽候到欲暗仔，麻射也注過矣，刀也開好矣，我就會倒咧病床，歇睏幾若工，毋免去讀冊。
入去手術房，麻醉師叫我蝹像蝦仔注麻射，一睏仔過才開始開刀。因為theh-theh麻下半身，割開毋知影疼，不而過腸仔肚hőng 搝振動的感覺誠明，畢竟腹內的器官攏有牽連，醫生若搝了較大力，我閣會哀出聲。手術的時間無眞長，hőng 捒出來了後，醫生用鋏仔對盤仔底夾一橛白白若雞母蟲的物件予阿母佮我看，講：「佳哉有緊來開刀，若等甲盲腸內面白白的膿煏破變腹膜炎，就會加眞麻煩。」
一直攏足淸醒的我，隨聽甲愣去。彼日割盲腸的起因是一跤猶未完成的便當袋仔，哪知彼跤便當袋仔落尾煞變做我的救星，予我閃掉腹膜炎感染的厄運。人生的好歹字運，無跋到底，攏袂按算得。
鼻芳的蛇
二伯後尾門仔外口便所前的灶頂，燒氣對a-lú-mih1 鼎蓋邊衝出來，霧甲全白煙了了。衝咧浮咧衝咧浮咧，和生仔鐵的鼎墘相硞，直直出聲。鼎底是阿媽當咧煮的米糠，欲煮予一陣精牲仔食。
搬來中部以後，阿公總是揣代誌做，做議量、做心適也做安心，就算毋免鬥趁錢，也毋願hőng 看做是加額的。伊佇厝後角搭一間寮仔，鎭東鎭西兼飼精牲仔，閣吩咐愛佇另外一爿用紅磚仔疊一口大灶，平時抾阿公木工做賰的柴角仔佮鋸屑烌來燃火煮飼料，啊若年節仔煠粽炊粿，進前就愛先共規支規箍的柴囥現現，較袂粿炊到一半，火煞化去。
大灶起踮厝後角，較袂柴一下燃，內面底就全煙了了，這是有道理也講會過的。毋過，將便所佮浴間也起佇後尾門仔出去的所在，是驚氣味無好？抑是驚洗身軀會共人吵著？我較想嘛想袂曉。干焦會記得暗來，若出去洗身軀抑是去佮浴間公家壁的便所，攏會聽著後壁溝彼爿的竹仔予風吹甲「吱吱拐拐」，袂輸恐怖片鬼仔欲出場的配音，聽咧誠驚。
尤其是彼年收成，一个來鬥做工課的親情，身軀洗甲一半，煞佇浴間仔曲去了後，便若日頭落山，去外口洗盪便所就予我足刺鑿，到今猶三不五時夢見厝後的便所和浴間仔。
米糠一下煮幾若點鐘，阿媽食飽晝，共柴添予滇就轉去房間睏晝。向時家族仔內賰我一个猶未去讀冊，不時嘛佇阿公的尻川後綴牢牢。彼日中晝我揣無阿公，幌去隔壁工廠邊仔看覓，連厝前後壁踅透透也攏看無人，才想欲對二伯兜的後尾門仔趖入去，軁過相迵的食飯間，抄近路轉去阮彼棟。
就佇我手摸著網仔門的手扞仔準備欲搝開的時，一下越頭，看著一尾蛇蜷佇浴間地磚的壁角，頭擔懸懸，佮我對
相。
我大力哀出聲，聲音迵過磚仔壁，厝裡的大人一个一个攏聽著矣。𪜶開始鬥揣阿公來掠蛇，哪知較咻嘛咻無人，阿公猶是無看咧影，只好央工廠的少年人來鬥相共。一睏仔過，一尾並我手骨較粗的飯匙銃就予𪜶掠走矣。
蛇掠煞，厝裡的大人猶會袂煞。講誠好佳哉我無出代誌，遐爾大尾的蛇連大人看著嘛驚甲，萬不幸若去予咬著，看是欲按怎？這時，阿公出現矣，原來伊佇二樓厝尾頂漆尪架桌，收音機放甲大大聲，閣那聽那哼歌。
阿公聽了緊共我攬予牢，那惜喙裡那喃：哪會遐拄好？遐拄好予我看著彼尾蛇，也遐拄好伊佇樓尾頂無聽著聲，才會佮彼尾蛇相出路，無通佇我驚著的時出面掠蛇。阿公越頭看彼鼎滾甲芳衝衝的米糠，講彼尾蛇應該是予米糠唌來的。顚倒是我，毋但無驚甲嘛嘛吼，煞風神甲，大人愈呵咾，我就愈食褒愈臭煬，將看著彼尾蛇準做是足厲害的代
誌，袂輸英雄仝款，我感覺我這个屁窒囡仔，一霎仔久，也雄雄躘大。
等啊等，總算等到尾暗仔哥哥姊姊咧欲下課轉來的時間矣。我袂赴聽候暗頓做伙食飯才共𪜶展，走去花園仔張。看一个講一擺，那講閣那比手畫刀：「我今仔日佇二伯𪜶浴間仔看著一尾蛇喔，有遐—大尾⋯⋯ 」雙手展開開，那楦那闊，愈楦愈闊。
2026專利防護中